అందరికి నమస్కారము,

బేఏరియా తెలుగు అసోసియేషన్ (బాటా) ఎందరో ఉత్సాహపరులైన ఔత్సాహికుల కృషితో "ఇంతింతై వటుడింతై" అన్నట్లు గత ముప్పది తొమ్మిది సంవత్సరాలలో ఎంతో సర్వతోముఖాభివృద్దిని సాధించింది.

శాస్త్రీయ సంగీత నృత్యములతో, సాంఘిక, పౌరాణిక నాటకాలతో, జానపద నృత్యములతో, సంగీత విభావరులతో, హాస్యవల్లరులతో ఎన్నో చక్కని కార్యక్రమాలు అందిస్తూ, అందరి అభిరుచులకు అనుగుణంగా తెలుగు సంస్కృతి సాంప్రదాయాలను ప్రతిబింబించే కార్యక్రమాలను నిర్వహిస్తోంది. కేవలం సాంస్కృతిక కార్యక్రమాల ద్వారా బేఏరియాలో ఉన్న తెలుగు వారు కలవడానికి, కళాకారులు తమ ప్రతిభను సాటి వారితో పంచుకోవడానికి ఉపయోగపడే ఒక వేదికలానే నిలిచిపోకుండా, మన దేశంలోను, అమెరికాలోను జరిగిన దుర్ఘటనలకు, దుస్సంఘటనలకు స్పందించి తమకు చేతనైన రీతిలో విరాళాలు, సహాయ సహకారాలు అందించడంలో ముందంజ వేసింది.

గతకాల నిజకీర్తి మీదే ఆధారపడకుండా, బాటా మరెన్నో మెరుగైన కార్యక్రమాలతో మీ ముందుకు వస్తుంది.  ఇందుకు మీ అందరి ప్రోద్బలమెంతో అవసరం. మీరందరూ బాటాలో సభ్యులుగా చేరి, మమ్మల్ని ప్రోత్సహిస్తూ బాటా అభివృద్దికి తోడ్పడుతారని భావిస్తున్నాను.

'బాటా' సాధించిన ఈ ప్రగతి వెనుక ఎందరో కళాకారుల, కార్యకర్తల శ్రమ దాగి ఉంది. వారందరికీ నా హృదయపూర్వక అభినందనలు.  ఉగాది వేడుకల మద్య రూపుదాల్చిన నా నూతన కార్యవర్గానికి చేయూతనిచ్చి ముందుకు నడిపిస్తూ 'బాటా' మరెన్నో ఉన్నత శిఖరాలను అధిగమించడానికి నా వెన్నంటి వుండి ప్రోత్సహిస్తారని, మీ ఆదరాభిమనాలు ఎల్లప్పుడూ నాతో ఉంటాయని ఆశిస్తూ,

మీ,

శ్రీలు వెలిగేటి